Ondanks die onzin met de klokke, bin ik alderbastend fèèil op zommer

Ondanks dè’k nogal lui van aard binne, hè’k wel altijd wark ‘ehad. Behalve veurig zommer met de originele corona. Toen hà’k èèm gin bane mar zèè de regèring dè’k thuus mosse wark’n. Ja, veur niks zeker, dan kon ik net zo goed nit thuusbliem’.

Oaver wark ‘esprokk’n, wee’j wa’k een intresant wark-gerelateerd fenomeen vinne? Zommertied. Ik had es een collega en as begin van ‘t veujoar de klokke een uur veuruut was ‘edreijt, kwam hij die moandag steurig een uur te láte op wark. Ja, nösterig kwam ‘e dàn binn’n, kats vergett’n de wekker te zett’n; ie kent det genöhl wel. Mar, wie hadd’n ‘m wel in de smiez’n want in’t noajoar kwam ‘e nooit een uur te vrog.

Ondanks die onzin met de klokke, bin ik alderbastend fèèil op zommer. Doar geniet ik vàn. Ik bin een dagjesmens, en zo mangs met de auto d’r op uut mag ik onmundig gèèrne doon. In vriewel gin ander land as bie ons ku’j van alles zéén zonder vàn huus te goan, bie wieze van sprekk’n. Laatst nog; lekker toer’n op de provincieweg. De snelweg geet mie veuls te hard. Ik ree doar fijn op een mooie nommedag en keek zo es neust de weg noar de melkbeeste, een paar gèngel’n zo met mie met. Iederene was vrolijk, ook de automobilist’n achter mie. Allemoa toeter’n en dàn as ze langs mie rééjn, iederene zwaai’n. Ja, mooi.

Toen hà’k inens plietsie achterop, zo’n snôtterbelle zèè dè’k te droa ginge. Mar ik krége gelukkig gin bekeuring want hij had’ bonn’nboekje nit in zien fietstasse.

Det laatste verhaal mot ’r eigenlijk nog ankomm’n, dus misschien later mèèr….

Herscho Duds (62) is een geboren Sallander, werkt in de VS als universitair wetenschapper en schrijft columns in Sallands dialect